ཡོན་ཏན་པ།

ཡོན་ཏན་པ།              རྩོམ་པ་པོ། རྨེའུ་དཀོན་རྒྱམ།
༡༽ བྱ་དངོས་གནས་ཚུལ་གང་ལ། །
ཤེས་ཚད་མཐོན་པོའི་ཐོག་ནས། །
ཞིབ་འཇུག་གཏིང་ཟབ་དགོས་པ། །
ཡོན་ཏན་པ་ཡི་ཁྱད་ཆོས། །
༢༽ ཕུགས་བསམ་ཟབ་མོས་བསླངས་ཏེ།།

རེ་འདུན་འཚོལ་སྙེད་སླད་དུ། །
འབད་བརྩོན་རྒྱུན་སྐྱོང་དགོས་པ། །
ཡོན་ཏན་པ་ཡི་སྙིང་སྟོབས། །

༣༽ རྣམ་དཔྱོད་ཡངས་པོས་བསྐུལ་ཏེ། །
བདེན་པའི་ཕྱོགས་སུ་ལངས་ནས། །
ལ་རྒྱའི་གདེང་སྤོབས་དགོས་པ། །
ཡོན་ཏན་པ་ཡི་རང་ཚུགས། །

༤༽ ལྷག་བསམ་དག་མོས་བསྲིངས་ཏེ། །
ལག་ལེན་གནད་སྨིན་བསྟར་ནས། །
གྲུབ་འབྲས་རླབས་ཆེན་དགོས་པ། །
ཡོན་ཏན་པ་ཡི་བྱས་རྗེས། །