རྩམ་པའི་སྟོབས་ཤུགས།

༄།། རྩམ་པའི་སྟོབས་ཤུགས། རྩོམ་པ་པོ། འཆམ་ར་དྲི་མེད་རྒྱལ་མཚན།
ལས་ཀྱི་ཕ་ཟས་དཀར་པོ་རྩམ་པ་ཡིན།།
ཕ་དང་མེས་པོའི་ལུས་སྟོབས་འདི་ཡིས་རྒྱས།།
རྒྱལ་སྲུང་དམག་འཐབ་སྙིང་སྟོབས་འདི་ཡིས་བསྩལ།།
རྒྱལ་ཁབ་ཤོར་ཡང་ཁ་ཟས་འདི་རང་ཡིན།།
འཐབ་རྩོད་སྙིང་སྟོབས་ཉམས་སོང་མེད་རྟགས་ཡིན།།

ཁྱེད་ཀྱི་སྐྱེས་སྐར་བསུ།

༈ ཁྱེད་ཀྱི་སྐྱེས་སྐར་བསུ། རྩོམ་པ་པོ། འཆམ་ར་དྲི་མེད་རྒྱལ་མཚན།
ཨ་ཕ་སྟག་རྒོད་འདྲ་མོ་གཡས་ན་བཞུགས་ནས།
ཨ་མ་རྨ་བྱ་འདྲ་མོ་གཡོན་ན་བཞུགས་ནས།
བུ་ཆུང་སེང་ཕྲུག་འདྲ་མོའི་སྐྱེས་སྐར་བསུའོ། །
ཉི་མ་གནམ་ལ་ཤར་བྱུང་། གངས་རི་ས་ལ་འགྱིང་སོང་།
ཁྱེད་ཀྱི་སྐྱེས་སྐར་གནམ་སའི་བར་ནས་བསུ། །
བཀྲ་ཤིས་སྨོན་འདུན་སེམས་པའི་གཏིང་ནས་བྱ། །
བདེ་སྐྱིད་འཚོ་བས་སྐུ་ཚེ་རིང་པར་ཤོག།

གཤོག་པ་ཅན།

༈ གཤོག་པ་ཅན། རྩོམ་པ་པོ། འཆམ་ར་དྲི་མེད་རྒྱལ་མཚན།
༈ བྱ་ཐང་དཀར་གསེར་གྱི་གཤོག་པ་ཅན། །
འཕུར་བསམ་ན་འདབ་མ་རང་འགྲུབ་རེད། །
དགུང་ནམ་མཁའི་ཁ་རྒྱ་ཆེན་པོ་འདི། །
བྱ་ཁྱོད་ཀྱི་བསོད་ནམས་དབང་ཐང་རེད། །

བུ་ཆུང་ཚེ་རིང་དོན་འགྲུབ།

༈ བུ་ཆུང་ཚེ་རིང་དོན་འགྲུབ། རྩོམ་པ་པོ། འབའ་སྲས།
༈ ཁྱོད་འཇིག་རྟེན་གྱི་མིག་ཟུང་དང་པོ་ཕྱེས་དུས།
ཕ་ལོ་ང་ཁྱོད་ཀྱི་མདུན་དྲུང་དུ་ལངས་ཡོད།
ཁྱོད་མི་ཚེ་ཡི་གོམ་པ་དང་པོ་སྤོ་དུས།
ཕ་ལོ་ངས་ཁྱོད་ཀྱི་ལག་མགོར་འཇུས་ཡོད།