ཕོ་རྒོད་འབོད་པའི་གད་རྒྱངས།

༄།། ཕོ་རྒོད་འབོད་པའི་གད་རྒྱངས། རྩོམ་པ་པོ། འཆམ་ར་དྲི་མེད་རྒྱལ་མཚན།
སྟག་ཤ་ར་ཤ་རྒོད་དཔུང་པ་ཅན།། དཔའ་ཡོད་ན་དཔུང་པ་ངོམ་རན་སོང་།།
ཕྱིའི་དགྲ་བོས་ཕ་ས་འཕྲོགས་ཚར་སོང་།། འཕྲོགས་ཚར་ནས་རྒྱ་གྲོང་བཟོས་ཚར་སོང་།།
དུས་ད་ནི་མེད་ན་མེད་ལེ་ཡིན།།

དཔའ་རྒོད་ཁྲག་གིས་ཚོས་པའི་ཞལ་ཆེམས།

༄།། དཔའ་རྒོད་ཁྲག་གིས་ཚོས་པའི་ཞལ་ཆེམས། རྩོམ་པ་པོ། འཆམ་ར་དྲི་མེད་རྒྱལ་མཚན།
ད་བུ་ཁྱོད་མ་འདུག་རི་ལ་སོང་།། རི་ལུང་པ་བསྐོར་ནས་ས་མཐར་སོང་།།
ངའི་རེ་སྨོན་ཁུར་ནས་རྒྱང་ལ་སོང་།། བུ་ཁྱོད་ཀྱི་སྲོག་འགོ་ཐོན་པ་གྱིས།།
ཐོན་སོང་ན་དགྲ་ལན་མ་བརྗེད་དགོས།། ང་ཨ་ཕའི་ལས་དབང་གཡུལ་སར་ཡོད།།
ཁ་ཕྱི་ལ་མི་སྐོར་སེམས་ཐག་ཡིན།།

དམག་ལ་ཆས་པ།

༄།། དམག་ལ་ཆས་པ།
 རྩོམ་པ་པོ། འཆམ་ར་དྲི་མེད་རྒྱལ་མཚན།
ཕུ་ཡར་ན་རི་ཞིག་ཡོད་རྒྱུ་འདི།། ཕ་མེས་པོ་ཚང་གི་བླ་རི་རེད།།
བུ་དམག་ལ་འགྲོ་དགོས་ལས་དབང་རེད།། དམག་ཕར་འགྲོའི་དགྲ་ལྷ་དར་བ་ཤོག།

ཕོ་རབ་ཅིག་ལ་གཏམ་རབ་དགོས།

༄།། ཕོ་རབ་ཅིག་ལ་གཏམ་རབ་དགོས། རྩོམ་པ་པོ། འཆམ་ར་དྲི་མེད་རྒྱལ་མཚན།
ད་མ་འདུག་ཕོ་སྐྱེས་ཡར་ལོངས་དང་།། དགྲ་ཕྱི་ནང་གཉིས་ཀྱིས་མཐའ་སྐོར་བྱུང་།།
ཁ་ཕོ་རུས་མེད་ན་མནན་ལེ་རེད།། ཞེ་རུས་པ་མེད་ན་ཚར་ལེ་རེད།།
བུ་སུས་བཙོག་སྟོང་སྡེའི་སྔུན་ནས་ལྟ།།

ཕྱིར་ཕེབས་རོགས།

ཕྱིར་ཕེབས་རོགས། རྩོམ་པ་པོ། མུ་ལ་ནས།
གངས་སེང་དཀར་མོའི་ཕ་ས། །
གངས་དཀར་ལྷུན་པོ་མཐོང་དུས། །
གཡུ་རལ་ཅན་གྱི་གངས་སེང་། །
ཡིད་ལ་ཡང་ཡང་དྲན་གི །
ང་ཡི་གངས་སེང་ལགས། ཕྱིར་ཕེབས་རོགས།
གཡུ་ཡི་རལ་བ་གསིག་བཞིན། །
མྱུར་ཏུ་ཕེབས་རོགས།

ང་ཚོས་གཅེས་སྐྱོང་བྱ་དགོས།

༈ ང་ཚོས་གཅེས་སྐྱོང་བྱ་དགོས། རྩོམ་པ་པོ། མུ་ལ།
མེས་པོས་བཞེངས་པའི་ཕ་མཁར། །
སྐྱབས་མཆོག་བླ་མའི་ཕོ་བྲང་། །
གནས་མཆོག་པོ་ཏ་ལ་འདི། །
ང་ཚོས་གཅེས་སྐྱོང་བྱ་དགོས། །

མཐུན་སྒྲིལ།

༄༅། ། མཐུན་སྒྲིལ། རྩོམ་པ་པོ། ཚིག་མུ་ལ།
སྟོན་པ་གཅིག་ལས་ཆད་པའི།།
གྲུབ་མཐའ་སོ་སོའི་བར་ལ།།
ཕྱོགས་ཞེན་ཆགས་སྡང་མ་བྱེད།།
མཐུན་སྒྲིལ་ཨ་ལོང་དམ་དགོས།།

ཁ་བའི་རྒྱན་ཆ་རེད།

༄༅། ། ཁ་བའི་རྒྱན་ཆ་རེད། རྩོམ་པ་པོ། ཚིག་མུ་ལ།
ཕྱོགས་ཞེན་ཆགས་སྡང་བྲལ་བའི་བླ་མ་གཅིག །
གཞན་ཕན་ཁོ་ན་བསྒྲུབ་པའི་དཔོན་པོ་གཉིས། །
མཐུན་སྒྲིལ་ཨ་ལོང་དམ་པའི་འབངས་མི་གསུམ། །
འདི་གསུམ་འཛོམ་ན་ཁ་བའི་རྒྱན་ཆ་རེད། །

རྣམ་དཔྱོད་ངོམ་དགོས།

༈ རྣམ་དཔྱོད་ངོམ་དགོས། རྩོམ་པ་པོ། འཆམ་ར་དྲི་མེད་རྒྱལ་མཚན།
དཔའ་རྩལ་དཔའ་རྩལ་ཟེར་ནས་ཡོད་མདོག་བསྟན་ཀྱང་། །
རྣམ་དཔྱོད་དཔའ་རྩལ་མེད་ན་ཁ་ཕོས་ཅི་ཕན། །
ལུག་རྒན་རྡུང་ཁ་བརྒྱབ་ནས་ཀླད་ཁྲག་འདྲེས་འདུག །
གྲི་འགོ་འཕུར་རྒྱུ་མ་མང་གངས་ཅན་བོད་པ། །

སླེབས་བྱུང་།

༈ སླེབས་བྱུང༌། རྩོམ་པ་པོ། ནང་ཆེན་ཁམས་སྲས།
རྩོམ་པ་པོ། ནང་ཆེན་ཁམས་སྲས།
གདོང་ལྔའི་རྒྱལ་དར་འཕྱར་བཞིན་སླེབས་བྱུང༌།
ཞི་བདེའི་ཁ་གཡང་སྒྲོག་བཞིན་སླེབས་བྱུང༌།
པོ་ཏ་ལའི་གཟི་བྱིན་ལ་མིག་ཟུང་ཅེར་ཏེ་སླེབས་བྱུང༌།
འབོད་བཞིན་པའི་ཚིག་འབྲུ་རེ་རེ་ནི་རང་དབང་དང་འདྲ་མཉམ་ཡིན་ལ།
བསམ་བཞིན་པའི་ཆོད་སེམས་རེ་རེ་ནི་རྒྱལ་གཅེས་དང་རིགས་ཞེན་རེད།

བརྗེད་པ་མི་སྲིད། རྩོམ་པ་པོ། ནང་ཆེན་ཁམས་སྲས།

༈ བརྗེད་པ་མི་སྲིད། རྩོམ་པ་པོ། ནང་ཆེན་ཁམས་སྲས།
གཡོ་སྒྱུ་ཐབས་ཀྱི་བསླུ་བྲིད་མཁས་ཀྱང༌།།
ལོ་རྒྱུས་དོན་རྐྱེན་བརྗེད་པ་མི་སྲིད།།
དྲག་པོའི་དཔུང་གི་རྔམ་ཟིལ་ཆེ་ཡང༌།།
བདེན་པའི་ཐོབ་ཐང་བསྐྱུར་བ་མི་ཕོད།།

སྣང་ཉམས།

༈ སྣང་ཉམས། རྩོམ་པ་པོ། སྡེ་དགེ་ཀརྨ་རྣམ་དག
སྐྱ་ཁྲ་ཧོར་པས་གཏོར་བའི།།
ཚང་མལ་ས་ལ་འཐོར་འདུག།
རྒྱབ་རིའི་བྲག་དཀར་སྐྱིབས་ན།།
ཕུག་རོན་མཐོང་རྒྱུ་མི་འདུག།

ཇེ་ཉེ་ཇེ་ཆེ་རེད།

༈ ཇེ་ཉེ་ཇེ་ཆེ་རེད། རྩོམ་པ་པོ། འཆམ་ར་དྲི་མེད་རྒྱལ་མཚན།

ཕུ་རིའི་ཕུ་ལ་བལྟས་པས།
ཞབས་རྗེས་རེ་རེ་སྲིད་པའི་གངས་ལ་གཏོད་འདུག
རླུང་དམར་རྒྱག་ཐེངས་རེ་རེ།
མེ་ལྕེ་འབར་ཐེངས་རེ་རེ།
ཞབས་རྗེས་རི་མོ་ཇེ་གསལ་ཇེ་གསལ་རེད།
སེམས་ཀྱི་ཁ་ཐག་ཇེ་ཉེ་ཇེ་ཉེ་རེད། 

གངས་རི་དཀར་པོའི་སྒལ་ཚིགས།

༈ གངས་རི་དཀར་པོའི་སྒལ་ཚིགས། རྩོམ་པ་པོ། འཆམ་ར་དྲི་མེད་རྒྱལ་མཚན།
ཕ་ས་ཕ་ཡུལ་དག་པའི་ཞིང་ཁམས་ཡིན། །
ཤར་གྱི་ཇག་པས་བཟུང་བའི་བཙོན་རྭ་ཡིན། །
སྡུག་གི་མིག་ཆུ་ཤད་པའི་སྤུན་ཟླ་རྣམས། །
གངས་རི་དཀར་པོ་འདི་ཡི་སྒལ་ཚིགས་ཡིན། །

མེ་ལྕེའི་ནང་གི་བོད།

༈ མེ་ལྕེའི་ནང་གི་བོད། རྩོམ་པ་པོ། འཆམ་ར་དྲི་མེད་རྒྱལ་མཚན།

 མེ་ལྕེའི་ཚ་ངར་རེ་རེ། ཁྱེད་ཀྱི་སྙིང་སྟོབས་རེ་རེ།

དུང་དཀར་པོའི་ཡུལ་ལྗོངས་ཆགས་འདྲ་བོ། །

སྡུག་སྨག་ནག་ནང་གི་ཁ་བ་ཅན། །

ལྷབ་ལྷུབ་ཏུ་འབར་བའི་མེ་ལྕེའི་གསེང་ནས།

ལྷང་ལྷང་དུ་འབོད་པའི་གདུང་ངག་ཁྲོད་ནས།

ཇེ་དཀར་ཇེ་དཀར་རེད་བྱུང་།

ཇེ་གསལ་ཇེ་གསལ་རེད་བྱུང་།

མེ་སྟག་ཐར་ར་ར། མདུན་མཆོང་ཤིགས་སེ་ཤིག

བུ་ཁྱེད་ཀྱི་བསམ་དོན་འགྲུབ་པར་ཤོག །

བུ་ཁྱེད་ཀྱི་བསམ་དོན་འགྲུབ་པར་ཤོག རྩོམ་པ་པོ། སང་རྡོར།

བོད་གངས་ཅན་ཆོས་ཀྱི་ཞིང་ཁམས་ན། །

རྗེ་བླ་མའི་མཛད་ཕྲིན་རྒྱས་ནས་བྱུང་། །

ལྷོ་འཛམ་གླིང་ཆོས་འཁོར་ཡང་ཡང་བསྐོར། །

མ་སེམས་ཅན་བདེ་སྐྱིད་ལྡན་པར་ཤོག །

གང་སྐུ་ཚེ་ཞབས་པད་བརྟན་པར་ཤོག། 

གཞོན་པའི་རོལ་དབྱངས།

༈ གཞོན་པའི་རོལ་དབྱངས། རྩོམ་པ་པོ། འཆམ་ར་དྲི་མེད་རྒྱལ་མཚན།

རི་བོ་མཐོན་པོ་ཇོ་མོ་གླང་མ་སྤྲིན་པའི་མཚམས་ནས་གྱེན་དུ་ལངས་སོང་།།

མེས་པོའི་ལོ་རྒྱུས་ཤུལ་བཞག་རིང་མོ་རྒྱ་མཚོ་ཆེན་པོའི་རླབས་དང་འདྲོགས་སོང་།།

དགྲ་བོའི་མནར་གཅོད་ལུས་ལ་ཐིམ་ནས་རུས་པའི་གཏིང་དུ་ཟུག་གཟེར་རྒྱག་བྱུང་།།

རེ་བ་འབུམ་གྱི་ཕྱིར་མིག་ཀློང་ནས་ང་ཚོ་གཞོན་པས་རུ་དཔུང་སྒྲིག་འགྲོ།

བརྗེད་མེད།

༈ བརྗེད་མེད།

                          རྩོམ་པ་པོ། འཆམ་ར་དྲི་མེད་རྒྱལ་མཚན།
མི་ཚེ་མི་ཡུལ་ནས་རྫོགས་ཀྱང་།།

ལྷ་སའི་ཇོ་བོ་དེ་བརྗེད་མེད།།

ཉལ་བའི་རྨི་ལམ་གྱི་ནང་ནས།།

མིག་ཆུའི་མཆོད་པ་རེ་ཕུལ་ཡོད།།

གདོང་དམར་བོད་པ།

གདོང་དམར་བོད་པ།
                 རྩོམ་པ་པོ། གཉན་པོ།
གདོང་དམར་བོད་འདི་བཙན་པོའི་རྒྱུད།།
དཔའ་ངར་བྲེ་སེར་འབྲོང་གི་སྤུན།།
རྟ་དམག་སྟོང་གི་ཟིལ་ཤུགས་ཀྱིས།།
ས་ཆེན་ཁྱོན་ལ་དབང་བསྒྱུར་མྱོང་།།

གངས་དཀར་པོ།

 གངས་དཀར་པོ། རྩོམ་པ་པོ། འབའ་སྲས།
              ༼༡༽
གངས་དཀར་པོ། གངས་དཀར་པོ།
གངས་དཀར་པོ་ཉི་མ་ཤར་ས་རེད།
གངས་དཀར་པོ་འཇའ་ཚོན་བཀྲ་ས་རེད།
གངས་དཀར་པོ། གངས་དཀར་པོ། གངས་དཀར་པོ་ང་ཡི་ཕ་ཡུལ་རེད།