མཇལ་སྐོར་ཨེ་སོང་།

༈ མཇལ་སྐོར་ཨེ་སོང་། རྩོམ་པ་པོ། འཆམ་ར་དྲི་མེད་རྒྱལ་མཚན།
དབུས་ལ་རྩེ་སྐོར་སོང་ཡིན། ། ལྷ་སའི་ཇོ་བོ་མི་འདུག །
ལྷ་སྲས་ཨུ་དུམ་བཙན་པོའི། །
ལྷམ་གོག་གཡོན་པ་མཇལ་སོང་། །

ལྷམ་ལ་མཛེེར་བུ་བརྡུངས་ནས། །

རྔུལ་ཆུའི་ཟུར་ན་དཔྱོང་འདུག ། 

ཁམས་ལ་བར་སྐོར་སོང་ཡིན། ། གེ་སར་རྒྱལ་པོ་མི་འདུག །
དཔའ་བོ་རླུང་འཁོར་ནག་པོའི། ། སྟ་རེ་ཁ་ཡ་མཇལ་སོང་། །
སྦྲ་ནག་གྲུ་བཞིའི་ཟུར་ནས། །
ཁྲག་གི་བཤུལ་དྲི་འཐུལ་བྱུང་། །

ཨ་མདོར་མཐའ་སྐོར་སོང་ཡིན། ། དགེ་འདུན་ཆོས་འཕེལ་མི་འདུག །
པེ་ཅིང་མཁར་ནས་ཉོས་པའི། ། སྒྲ་སྒམ་ཆ་འགའ་མཇལ་སོང་། །
སྒྲ་སྒམ་ནང་གི་གླུ་དབྱངས། །
བཙན་པོའི་དུར་སར་ཁྱབ་སོང་། །


•རླུང་འཁོར་ནག་པོ། རྒྱའི་དཔའ་རྒོད་ཅིག ༢༠༡༧་༨་༨ ཉིན།